నోరు అదుపులో పెట్టుకుంటా.. మరో ఛాన్స్ ప్లీజ్: బీసీసీఐకి మంజ్రేకర్ లేఖ

Share Icons:
భారత మాజీ క్రికెటర్, కామెంటేటర్ ఎట్టకేలకి వెనక్కి తగ్గాడు. 2019 వన్డే ప్రపంచకప్‌లో టీమిండియా ఆల్‌రౌండర్ రవీంద్ర జడేజాని ‘అరొకర’ ఆటగాడంటూ ఎద్దేవా చేసిన మంజ్రేకర్.. సహచర కామెంటేటర్ హర్షా భోగ్లాని హేళన చేస్తూ మాట్లాడాడు. గతంలోనూ ఐపీఎల్ సమయంలో ముంబయి ఇండియన్స్ ఆల్‌రౌండర్ కీరన్ పొలార్డ్‌‌ని ‘మతిలేని క్రికెటర్’ అంటూ సెటైర్ వేశాడు. మొత్తంగా.. అతని కామెంట్రీపై గత ఏడాదన్నరకాలంగా పెద్ద ఎత్తున విమర్శలు వస్తుండటంతో.. భారత క్రికెట్ నియంత్రణ మండలి (బీసీసీఐ) ఈ ఏడాది మార్చిలో కఠిన నిర్ణయం తీసుకుంది. తరచూ నోరు జారుతున్న మంజ్రేకర్‌ని బీసీసీఐ కామెంట్రీ ఫ్యానల్ నుంచి తప్పించింది. దాంతో.. టీమిండియా ఆడే మ్యాచ్‌లతో పాటు బీసీసీఐ ఆధ్వర్యంలో జరిగే ఐపీఎల్‌కి కూడా అతను కామెంట్రీ చెప్పేందుకు అనర్హుడిగా మారాడు.

బీసీసీఐ తనని కామెంట్రీ నుంచి తప్పిండంపై మంజ్రేకర్ అప్పట్లో మాట్లాడుతూ ‘‘నేను ఎవరినీ ఫూల్ చేయాలని అనుకోలేదు. ఎందుకంటే నా హద్దులు నాకు తెలుసు. అందుకే ఇన్నేళ్లు కామెంటేటర్‌గా కొనసాగాను. లేకుంటే.. ఐదేళ్ల ముందే నా కామెంటేటర్ కెరీర్ ముగిసిపోయేది. కామెంట్రీ బాక్స్‌లో బాధ్యతగా వ్యవహరించాను తప్ప.. ఎప్పుడూ హద్దులు మీరలేదు’’ అని వివరణ ఇచ్చుకున్నాడు. కానీ.. బీసీసీఐ మాత్రం అతని వివరణపై సంతృప్తి వ్యక్తం చేయలేదు.

యూఏఈ వేదికగా ఐపీఎల్ 2020 సీజన్ సెప్టెంబరు 19 నుంచి నవంబరు 8 వరకూ జరిగే సూచనలు కనిపిస్తుండగా.. త్వరలో కామెంట్రీ ఫ్యానల్‌ని బీసీసీఐ ప్రకటించబోతోంది. ఈ నేపథ్యంలో.. ఆ ఫ్యానల్‌లోకి తనని తీసుకోవాలని అభ్యర్థిస్తూ సంజయ్ మంజ్రేకర్ తాజాగా బీసీసీఐకి లేఖ రాశాడు. అందులో.. బీసీసీఐ గైడ్‌లైన్స్‌కి అనుగుణంగా నడుచుకుంటానని వాగ్దానం చేసిన మంజ్రేకర్.. ఇకపై నోరు జారనని హామీ ఇచ్చినట్లు తెలుస్తోంది. గతంలోనూ హర్షాభోగ్లేపై ఇదే తరహాలో బీసీసీఐ కన్నెర్ర చేసింది. 2016 టీ20 ప్రపంచకప్‌లో భాగంగా భారత్, బంగ్లాదేశ్ మధ్య జరిగిన మ్యాచ్‌లో.. టీమిండియా పోరాట పటిమ గురించి కాకుండా.. బంగ్లాదేశ్ ఆట గురించి అతిగా మాట్లాడటం ద్వారా హర్షాభోగ్లే విమర్శలు ఎదుర్కొన్నాడు. దాంతో.. 2017లో అతడ్ని కామెంట్రీ ఫ్యానల్ నుంచి తప్పించిన బీసీసీఐ.. తర్వాత ఏడాది మళ్లీ అవకాశమిచ్చింది.