ధోనీ లాంటి ఫినిషర్ కావలెను: ఆసీస్ కోచ్

Share Icons:
ఆస్ట్రేలియా క్రికెట్ జట్టుకి ప్రస్తుతం మహేంద్రసింగ్ ధోనీ లాంటి మ్యాచ్ ఫినిషర్ కావాలని ఆ జట్టు హెడ్ కోచ్ జస్టిన్ లాంగర్ అభిప్రాయపడ్డాడు. దక్షిణాఫ్రికాతో ఇటీవల ముగిసిన మూడు వన్డేల సిరీస్‌లో ఆస్ట్రేలియా ఓటములకి కారణం సరైన ఫినిషర్‌ లేకపోవడమేనని అంగీకరించిన లాంగర్.. ఇప్పుడు అన్వేషించాల్సిన సమయం వచ్చిందని చెప్పుకొచ్చాడు. ఆ సిరీస్‌లో నెం.6లో ఆడిన మిచెల్ మార్ష్ 32, 36 పరుగులతో సరిపెట్టాడు. ముఖ్యంగా.. మ్యాచ్ ఫినిషర్ పాత్రని సరిగా నిర్వర్తించలేకపోయాడు.

‘ఆస్ట్రేలియా టీమ్‌లో గతంలో మైక్ హస్సీ, మైకెల్ బెవాన్ రూపంలో ఇద్దరు మెరుగైన ఫినిషర్లు ఉండేవారు. వారు మ్యాచ్‌ల్ని ముగించడంలో సిద్ధహస్తులు. ప్రస్తుత తరంలో మ్యాచ్‌ల్ని ముగించడంలో ధోనీ ఓ మాస్టర్. అలానే జోస్ బట్లర్ (ఇంగ్లాండ్) కూడా చక్కగా ఆ బాధ్యతల్ని నిర్వర్తిస్తున్నాడు. ఇక్కడ నేను చెప్పేది ఏంటంటే..? ప్రతి జట్టూ ఒక ఫినిషర్‌‌ని టీమ్‌లో ఉంచుకుంటోంది. అందుకే ఆస్ట్రేలియా కూడా ఆ దిశగా అడుగులు వేయాలి’ అని లాంగర్ సూచించాడు.

గెలుపుపై టీమిండియా ఆశలు వదిలేసిన ఎన్నో మ్యాచ్‌ల్ని ధోనీ తన ఫినిషింగ్ స్కిల్స్‌తో గెలిపించాడు. ఇప్పటికే క్రికెట్ ప్రపంచంలో బెస్ట్ ఫినిషర్ ఎవరు..? అంటే ధోనీ పేరు ముందు వరుసలో ఉంటుంది. కానీ.. గత ఏడాది జులై నుంచి భారత్ జట్టుకి ధోనీ దూరంగా ఉంటుండగా.. ఇప్పుడు ఆ బాధ్యతని కేఎల్ రాహుల్ నిర్వర్తిస్తున్నాడు. భారత్, దక్షిణాఫ్రికా మధ్య మార్చి 12 నుంచి మూడు వన్డేల సిరీస్ జరగనుండగా.. కేఎల్ రాహుల్ ఐదో స్థానంలో బ్యాటింగ్ చేయనున్నాడు.