ధోనీ.. నువ్వు విరాట్ కోహ్లీకి ఎవరినిచ్చావు..?: గంభీర్ సూటి ప్రశ్న

Share Icons:
భారత మాజీ కెప్టెన్ మహేంద్రసింగ్ ధోనీ మెరుగైన జట్టుని విరాట్ కోహ్లీకి ఇవ్వలేదని మాజీ ఓపెనర్ విమర్శించాడు. సౌరవ్ గంగూలీ కెప్టెన్‌గా మంచి జట్టుని తయారు చేసి ధోనీకి ఇస్తే..? అతను మాత్రం కోహ్లీకి ట్రోఫీలను గెలిపించగలిగే జట్టుని ఇవ్వలేకపోయాడని గంభీర్ దుయ్యబట్టాడు. ఇటీవల ధోనీ‌ని లక్కీ కెప్టెన్‌గా అభివర్ణించిన గంభీర్.. మెరుగైన టీమ్‌ ఉండటంతోనే అతను పెద్దగా కష్టపడకుండానే ఐసీసీ ట్రోఫీలు గెలిచినట్లు వ్యాఖ్యానించిన విషయం తెలిసిందే.

ఈఎస్‌పీఎన్‌ క్రిక్‌ఇన్ఫోకి ఇచ్చిన ఇంటర్వ్యూలో తాజాగా గౌతమ్ గంభీర్ మాట్లాడుతూ ‘‘ధోనీ కెప్టెన్సీ నుంచి తప్పుకున్నప్పుడు.. విరాట్ కోహ్లీకి క్వాలిటీ ప్లేయర్స్‌ని అతను ఇవ్వలేకపోయాడు. జట్టులో కోహ్లీ, రోహిత్ శర్మ, జస్‌ప్రీత్ బుమ్రా మినహా ఎవరూ చెప్పుకోదగ్గ ఆటగాళ్లు లేరు. ముఖ్యంగా.. టోర్నమెంట్‌లలో జట్టుని గెలిపించగల వరల్డ్‌ క్లాస్ బ్యాట్స్‌మెన్‌లు లేరు. అప్పట్లో సౌరవ్ గంగూలీ.. యువరాజ్ సింగ్, హర్భజన్ సింగ్, జహీర్ ఖాన్, వీరేంద్ర సెహ్వాగ్ లాంటి వారిని తయారుచేసి ధోనీకి ఇచ్చాడు. కానీ.. ధోనీ మాత్రం కోహ్లీకి ఎవరినిచ్చాడు..?’’ అని ప్రశ్నించాడు.

2000లో భారత్ జట్టు ఫిక్సింగ్ వివాదంలో కూరుకుపోయిన దశలో కెప్టెన్‌గా బాధ్యతలు చేపట్టిన గంగూలీ.. టీమిండియాకి దూకుడు నేర్పి విదేశాల్లోనూ జట్టుకి విజయాల్ని అందించాడు. ఈ క్రమంలో ఎంతో మంది యువ క్రికెటర్లకి టీమ్‌లో అవకాశాలిచ్చిన దాదా.. 2005లో అవమానకరరీతిలో పగ్గాలను వదిలేయాల్సి వచ్చింది. ఆ తర్వాత 2007లో టీ20 కెప్టెన్‌గా బాధ్యతలు చేపట్టిన ధోనీ.. 2014 వరకూ మూడు ఫార్మాట్లలోనూ కెప్టెన్‌గా కొనసాగాడు. 2014లో టెస్టు కెప్టెన్‌గా మారిన కోహ్లీ.. 2017 ఆరంభం నుంచి పూర్తి స్థాయి కెప్టెన్‌గా కొనసాగుతున్నాడు.