ధోనీ ఆ తప్పిదం వరకూ వెయిట్ చేసి.. గేర్ మారుస్తాడు: డీన్ జోన్స్

Share Icons:
ఐపీఎల్ 2020 సీజన్‌ ముంగిట చెన్నై సూపర్ కింగ్స్ టీమ్‌ని ఒత్తిడిలోకి నెట్టే ఘటనలు చాలా చోటు చేసుకున్నాయి. యూఏఈ వేదికగా సెప్టెంబరు 19 నుంచి నవంబరు 10 వరకూ ఐపీఎల్ మ్యాచ్‌లు జరగనుండగా.. ఆగస్టు 20న అక్కడికి చేరుకున్న చెన్నై టీమ్‌ని కష్టాలు చుట్టుముట్టాయి. తొలుత ఆ జట్టులోని ఫాస్ట్ బౌలర్ దీపక్ చాహర్‌, బ్యాట్స్‌మెన్ రుతురాజ్‌ గైక్వాడ్‌తో పాటు 11 మంది టీమ్ స్టాఫ్ కరోనా వైరస్ బారినపడగా.. గంటల వ్యవధిలోనే టోర్నీ నుంచి వ్యక్తిగత కారణాలతో స్టార్ బ్యాట్స్‌మెన్ సురేశ్ రైనా నిష్క్రమించాడు. ఆ షాక్ నుంచి తేరుకునేలోపే ఆఫ్ స్పిన్నర్ హర్భజన్ సింగ్ కూడా తాను ఐపీఎల్ 2020 సీజన్‌కి దూరంగా ఉండనున్నట్లు ప్రకటించాడు. దాంతో.. రైనా రెగ్యులర్‌గా ఆడే నెం.3లో ఎవరు ఆడతారనే ప్రశ్నతో పాటు హర్భజన్ సింగ్ స్థానాన్ని భర్తీ చేసే బౌలర్ ఎవరు..? అని చెన్నై తర్జనభర్జనలు పడుతోంది. కానీ.. కెప్టెన్ ధోనీకి ఇలాంటి క్లిష్ట పరిస్థితుల్ని ఎలా హ్యాండిల్ చేయాలో బాగా తెలుసని మాజీ క్రికెటర్లు చెప్పుకొస్తున్నారు.

చెన్నై టీమ్‌లోని ఆటగాళ్లలో ఇప్పటికే కెప్టెన్ ధోనీ స్ఫూర్తి నింపి ఉంటాడని జోస్యం చెప్పిన ఆస్ట్రేలియా మాజీ క్రికెటర్ డీన్ జోన్స్.. మైదానంలో ఎలా క్రమశిక్షణతో మెలగాలో కూడా ఇటీవల జరిగిన క్యాంప్‌లో కెప్టెన్‌గా వారికి ధోనీ నేర్పించి ఉంటాడని చెప్పుకొచ్చాడు. ఐపీఎల్‌లో ఇప్పటి వరకూ 12 సీజన్లు ముగియగా.. టోర్నీలో చెన్నై టీమ్ ఆడిన ప్రతి సీజన్‌లోనూ ప్లేఆఫ్‌కి చేరింది. ఈ క్రమంలో ఇప్పటికే మూడు సార్లు టైటిల్ విజేతగా నిలిచిన చెన్నై.. గత ఏడాది కూడా ఫైనల్లో కేవలం పరుగు తేడాతో ముంబయి ఇండియన్స్ చేతిలో ఓడిపోయిన విషయం తెలిసిందే.

ఐపీఎల్‌లో ధోనీ కెప్టెన్సీ గురించి తాజాగా స్టార్ స్పోర్ట్స్ షోలో డీన్ జోన్స్ మాట్లాడుతూ ‘‘ధోనీ కెప్టెన్ కూల్. అతను మ్యాచ్‌లాడి దాదాపు 14 నెలలు అయ్యింది. అయినప్పటికీ చెన్నై టీమ్‌కి ఇటీవల చెన్నైలో జరిగిన క్యాంప్‌లో నా అంచనా ప్రకారం టీమ్‌లోని యువ క్రికెటర్లకి క్రమశిక్షణతో ఎలా మెలగాలో ధోనీ నేర్పించి ఉంటాడు. ఒక కెప్టెన్‌గానే కాకుండా బ్యాట్స్‌మెన్‌గానూ ధోనీ చాలా క్రమశిక్షణతో మెలుగుతాడు. క్లిష్ట పరిస్థితుల్లోనూ ప్రత్యర్థి టీమ్ తప్పిదం చేసే వరకూ వెయిట్ చేసి.. ఆ తర్వాత గేర్ మారుస్తాడు. ధోనీ సాధించిన ఘనతల్ని అభిమానులు ఎప్పటికీ మరిచిపోరు. భారత్ ఆల్‌టైమ్ టాప్-5 ప్లేయర్లలో ధోనీ కచ్చితంగా ఉంటాడు’’ అని డీన్ జోన్స్ వెల్లడించాడు.