దేశంలో 110కి చేరిన కోవిడ్ కేసులు.. నిర్ధారణ పరీక్షలపై కేంద్రం కీలక నిర్ణయం

Share Icons:
దేశంలో రెండో దశలో కొనసాగుతోంది. ప్రస్తుతం కోవిడ్ కేసుల సంఖ్య 110కి చేరుకోగా, ఆదివారం ఒక్క రోజే కొత్తగా 23 మందిలో వైరస్ నిర్ధారణ అయ్యింది. అత్యధికంగా మహారాష్ట్రలో 32 కేసులు నమోదయ్యాయి. ఆదివారం ఉత్తరాఖండ్‌లో తొలి కేసు బయటపడింది. యూపీ, మహారాష్ట్రలో కొత్తగా ఒక్కొక్క కేసు నిర్ధారణ అయినట్టు కేంద్ర హోం శాఖ వెల్లడించింది. ఇప్పటి వరకూ ఢిల్లీలో ఒకరు, కర్ణాటకలో ఒకరు కరోనా వైరస్ కారణంగా ప్రాణాలు కోల్పోయారు. అలాగే పది మంది బాధితులు కోలుకున్నట్టు తెలిపింది. మహారాష్ట్రలో 32, కేరళలో 22, ఢిల్లీలో 7, ఉత్తరప్రదేశ్‌లో 12, కర్ణాటకలో 6,లడఖ్ 3, తెలంగాణ 3, రాజస్థాన్ 2, జమ్మూ కశ్మీర్‌లో 2, తమిళనాడు, ఆంధ్రప్రదేశ్, పంజాబ్‌లో ఒక్కొక్కటి చొప్పున నమోదయ్యాయి. మొత్తం 110 కేసుల్లో 17 మంది విదేశీయులు ఉన్నట్టు పేర్కొంది.

మరోవైపు, భారత్‌కు వచ్చిన తర్వాత 28 రోజుల వరకు వైష్ణోదేవి సందర్శనకు రావొద్దని ఎన్‌ఆర్‌ఐ, విదేశీయులకు కాట్రాలోని శ్రీమాతా వైష్ణోదేవి ఆలయ పాలకమండలి సూచించింది. అలాగే తీవ్ర జ్వరం, దగ్గు, శ్వాస సంబంధిత సమస్యలతో బాధపడుతున్న భారతీయులు కూడా రావొద్దని.. అలాంటి వారంతా తమ సందర్శనను వాయిదా వేసుకోవాలని కోరింది. ఇదిలా ఉండగా, దేశంలో కోవిడ్ కేసులు పెరుగుతున్న నేపథ్యంలో కేంద్ర ఆరోగ్య శాఖ ఆదివారం కీలక ప్రకటన చేసింది. కొవిడ్‌-19 నిర్ధారణ కోసం మొదటి రెండు పరీక్షలు ఉచితంగానే నిర్వహించనున్నట్లు తెలిపింది. ఈ మేరకు కేంద్ర ఆరోగ్య శాఖ ప్రత్యేక కార్యదర్శి సంజీవకుమార్‌ ఓ ప్రకటనలో పేర్కొన్నారు.

దేశవ్యాప్తంగా కోవిడ్‌ నిర్ధారణ పరీక్షలు చేయించుకునే వారికి మొదటి రెండు పరీక్షలు ఉచితమేనని తెలిపారు. దేశవ్యాప్తంగా పరీక్షలు నిర్వహించేందుకు సరిపడినంత సామర్థ్యం మన వద్ద ఉందని, ఇప్పటి వరకూ మన సామర్థ్యాల్ని రోజుకు 10 శాతం మాత్రమే ఉపయోగిస్తున్నామని తెలిపారు. కరోనా లక్షణాలు లేని వారికి పరీక్షలు నిర్వహించవద్దని ఆరోగ్య శాఖ ఇప్పటికే సూచించిన విషయం తెలిసిందే. ఎవరికైనా లక్షణాలు ఉన్నట్లు అనుమానం ఉంటే ప్రభుత్వ హెల్ప్‌లైన్‌ నెంబర్‌ 011-23978046 కు ఫోన్‌ చేయాలని గతంలో తెలిపింది. ఈ నంబర్‌కు ఫోన్‌ చేసిన తర్వాత మీరు ప్రోటోకాల్‌ ప్రకారం పరీక్షలకు అర్హత సాధిస్తే.. ప్రభుత్వ అనుమతి పొందిన ల్యాబ్‌లో పరీక్షలు నిర్వహిస్తారు.

కరోనా వైరస్ తీవ్రరూపం దాల్చడం దానిని అడ్డుకొనేందుకు వివిధ దేశాలు శతవిధాలా ప్రయత్నిస్తున్నాయి. పలు నిషేధాజ్ఞలు విధిస్తూ ప్రజలను ఇళ్లు దాటి బయటకు రానీయకుండా కర్ఫ్యూ అమలు చేస్తున్నాయి. నగరాలు, సరిహద్దుల మూసివేత వరకు రకరకాల చర్యలు చేపట్టాయి. కరోనా వల్ల ప్రపంచవ్యాప్తంగా గత 24 గంటల్లో 500 మందిపైగా బలయ్యారు. ఐరోపా నుంచి ప్రయాణికుల రాకపై ఇటీవల నిషేధం విధించిన అమెరికా.. వాటిని బ్రిటన్‌, ఐర్లాండ్‌లకూ విస్తరిస్తున్నట్లు ప్రకటించింది. న్యూజెర్సీలో ఏకంగా కర్ఫ్యూ విధించారు.