దసరా కానుకగా ‘కలర్ ఫోటో’.. విడుదల తేదీ ఫిక్స్

Share Icons:
‘హృద‌య‌కాలేయం’, ‘కొబ్బరిమ‌ట్ట’ చిత్రాల‌ నిర్మాణ‌ సంస్థ అమృత ప్రొడ‌క్షన్ బ్యాన‌ర్‌పై.. శ్రవ‌ణ్ కొంక‌, లౌక్య ఎంట‌ర్‌టైన్మెంట్స్ స‌మ‌ర్పణ‌లో సాయి రాజేష్ నీలం, బెన్నీ ముప్పానేని నిర్మిస్తోన్న చిత్రం ‘కలర్ ఫోటో’. సందీప్ రాజ్ ద‌ర్శక‌త్వం వహించారు. సందీప్‌కు దర్శకుడిగా ఇదే తొలి చిత్రం. హాస్యనటుడు సుహాస్ హీరోగా పరిచయం అవుతున్నారు. చాందిని చౌద‌రి హీరోయిన్. సునీల్ కీల‌క పాత్ర పోషించారు. వైవా హ‌ర్ష మ‌రో కీల‌క పాత్రలో క‌నిపించ‌బోతున్నారు.

ఇటీవ‌లే ‘క‌ల‌ర్ ఫోటో’ టీమ్ విడుద‌ల చేసిన టీజ‌ర్‌కు, సాంగ్‌కి అనూహ్య స్పంద‌న ల‌భించింది. ఈ మూవీ టీజ‌ర్‌కు యూట్యూబ్‌లో మిలియ‌న్ల వ్యూస్ వ‌చ్చాయి. ఈ చిత్రానికి కాల‌భైర‌వ సంగీతం సమకూర్చారు. ఇప్పటికే టీజర్‌లో ఉన్న బ్యాక్ గ్రౌండ్ స్కోర్ వివిధ మ్యూజిక్ ప్లాట్‌ఫామ్స్‌లో ట్రెండ్ అవుతున్నట్లు ‘క‌ల‌ర్ ఫోటో’ యూనిట్ స‌భ్యులు చెబుతున్నారు. ఈ లాక్‌డౌన్‌లో ‘క‌ల‌ర్‌ ఫోటో’ పిక్చర్స్‌, విజువ‌ల్స్ ప్రేక్షకుల్ని ఆక‌ట్టుకోవ‌డంలో మెద‌టి స్థానంలో ఉన్నాయంటే అతిశ‌యోక్తికాదు.

అంత‌లా ఆక‌ట్టుకున్న ఈ చిత్రం అక్టోబ‌ర్ 23న విజ‌య‌ద‌శ‌మి సందర్భంగా విడుద‌ల చేయ‌టానికి నిర్మాత‌లు ముహుర్తం ఖ‌రారు చేశారు. అయితే ఇదే లాక్‌డౌన్‌లో ప్రేక్షకుల‌కి ద‌గ్గర‌య్యి అంద‌రి చేత ఆహ అనిపించుకున్న ‘ఆహ’ ఓటిటి ద్వారా ఈ చిత్రం ప్రేక్షకుల ద‌గ్గర‌కి వ‌స్తుంది. ‘ఎంట‌ర్‌టైన్‌మెంట్ ఇంటికొచ్చి ఇస్తాం. మీ మొబైల్స్‌, టివి, లాప్‌టాప్‌లు మా కోసం ఆన్ చేయండి చాలు. ఇంటికి వ‌చ్చి న‌వ్వించ‌డం మాకు కొత్త కాదు’ అంటున్నారు ద‌ర్శకుడు సందీప్‌.

కాగా, ఈ చిత్రానికి నిర్మాత సాయి రాజేష్ నీలం కథ అందించారు. క్రాంతి ప్రియం ఆర్ట్ డైరెక్టర్. వెంకట్ ఆర్ శాఖమురి సినిమాటోగ్రఫీ అందించారు. కోదాటి పవన్ కళ్యాణ్ ఎడిటర్. ఎ.విజయ్ ఫైట్స్ కంపోజ్ చేశారు.