ఢిల్లీ నుంచి వచ్చిన వారిపై సీఎం జగన్ కీలక ఆదేశాలు.. స్వచ్ఛందంగా ముందుకు రావాల్సిందే..

Share Icons:
ఢిల్లీలోని నిజాముద్దీన్ ప్రాంతంలో ప్రార్థనలకు వెళ్లి వచ్చిన వారు, వారితో సన్నిహితంగా మెలిగిన వారు స్వచ్ఛందంగా ముంకొచ్చి చికిత్స తీసుకోవాలి ముఖ్యమంత్రి వైఎస్ జగన్మోహన్‌రెడ్డి పిలుపునిచ్చారు. సకాలంలో వైద్యం తీసుకుంటే ఎవరికీ ఏం కాదని స్పష్టం చేశారు. రాష్ట్రంలో కరోనా నివారణ చర్యలపై రాష్ట్ర మున్సిపల్ శాఖ మంత్రి బొత్స సత్యనారాయణ, సీఎస్ నీలం సాహ్ని, డీజీపీ గౌతమ్ సవాంగ్‌తో సీఎం జగన్ సమీక్ష నిర్వహించారు. ఈ సందర్భంగా సీఎం జగన్ మాట్లాడుతూ.. స్వచ్ఛందంగా ముందుకొచ్చి పరీక్షలు చేయించుకుంటే వారి ఆరోగ్య పరిస్థితుులు మెరుగవుతాయని పేర్కొన్నారు. వైద్య, ఆరోగ్య శాఖ, పోలీసు శాఖలు కలిసి పనిచేసి, అనుమానితులందరికీ వైద్య సదుపాయాలు అందేలా చూడాలని అధికారులను ఆదేశించారు.

ఈ సందర్భంగా అధికారులు ఏపీలో కొత్తగా నమోదైన కేసులు వివరాలను సీఎం జగన్‌కు అందజేశారు. రాష్ట్రంలో కొత్తగా 17 కేసులు నమోదయ్యాయని, ఇప్పటి వరకు రాష్ట్రంలో 40 కేసులు నమోదైనట్లు చెప్పారు. వీటిలో అధిక శాతం ఢిల్లీ నుంచి వచ్చిన వారేనని వెల్లడించారు. వీరిలో 17 మందిని క్వారంటైన్‌కు పంపిచామని వెల్లడించారు.

అలాగే పట్టణ ప్రాంతాల్లో కరోనా నివారణ చర్యలపై సైతం సీఎం జగన్ సమీక్షించారు. పట్టణ ప్రాంతాల్లో ప్రతి కుటుంబాన్ని సర్వే చేస్తున్నారా? లేదా? అని ప్రశ్నించారు. పట్టణాల్లోనే కరోనా తీవ్రత ఎక్కువగా ఉందని, కాబట్టి నిరంతరంగా సర్వే కొనసాగించాలని సీఎం ఆదేశించారు. అలాగే ఎవరికైనా కరోనా లక్షణాలు కనిపిస్తే స్వచ్ఛందంగా ముందుకొచ్చి వివరాలు అందించాలని సూచించారు. ఒకవేళ ముందుకు రాకపోతే వారి కుటుంబ సభ్యులకే నష్టమన్నారు.

ఈ మేరకు ప్రజలకు అవగాహన కల్పించాలని సీఎం సూచించారు. అలాగే పట్టణ ప్రాంతాల్లో రైతు బజార్లు, సూపర్ మార్కెట్ల నిర్వహణకు సంబంధించిన వివరాలను సీఎం జగన్ అడిగి తెలుసుకున్నారు. కరోనా నియంత్రణకు పట్టణాల్లో డోర్ డెలివరీని ప్రోత్సహిస్తున్నట్లు అధికారులు తెలిపారు. ఈ సందర్భంగా ప్రతి దుకాణం ముందు నిత్యావసర ధరల బోర్డులు పెట్టాలని ఆదేశించారు. దీంతో ఏప్రిల్ 1వ తేదీ నుంచి దుకాణాల ముందు బోర్డులు పెట్టేలా చర్యలు తీసుకుంటామని అధికారులు తెలిపారు.