ట్రైనింగ్ మొదలెట్టిన టీమిండియా ఫాస్ట్ బౌలర్

Share Icons:
కరోనా వైరస్ కారణంగా దేశంలో లాక్‌డౌన్ విధించడంతో మార్చి నుంచి క్రికెట్‌కి దూరంగా ఉంటున్న భారత క్రికెటర్లు ఒక్కొక్కరు మళ్లీ ప్రాక్టీస్ మొదలుపెడుతున్నారు. గత ఆదివారం లాక్‌డౌన్‌‌ని సడలించిన కేంద్ర ప్రభుత్వం.. స్పోర్ట్స్ కాంప్లెక్స్‌, క్రికెట్ స్టేడియాలు తెరుచుకునేందుకు అనుమతిచ్చిన విషయం తెలిసిందే. దీంతో.. భారత ఫాస్ట్ బౌలర్ శార్ధూల్ ఈరోజు నెట్స్ ప్రాక్టీస్ చేసి ఐదు ఓవర్ల పాటు బౌలింగ్ కూడా చేశాడు. భారత్‌లో లాక్‌డౌన్ తర్వాత అఫిషియల్‌గా ప్రాక్టీస్ చేసిన టీమిండియా తొలి క్రికెటర్ ఠాకూర్.

నెట్స్‌‌లో ముంబయి అండర్-23 టీమ్ బ్యాట్స్‌మెన్ సిరాజ్ పాటిల్‌కి ఐదు ఓవర్ల పాటు బౌలింగ్ చేసినట్లు వెల్లడించాడు. అతనితో పాటు ముంబయి రంజీ టీమ్ ఓపెనర్ హార్దిక్ తోమర్ కూడా ప్రాక్టీస్ చేసినట్లు ఈ పేసర్ చెప్పుకొచ్చాడు. అయితే.. ఈ ప్రాక్టీస్ సెషన్‌లో ప్రభుత్వం నిర్దేశించిన నిబంధనలకి అనుగుణంగా సామాజిక దూరాన్ని తాము పాటించినట్లు కూడా ఠాకూర్ స్పష్టం చేశాడు.

‘‘చాలా రోజుల తర్వాత మళ్లీ ఈరోజు నెట్స్‌లో బౌలింగ్ ప్రాక్టీస్ చేశాను. సెషన్‌లో వేసింది ఐదు ఓవర్లే. కానీ.. మళ్లీ బౌలింగ్ చేయడాన్ని బాగా ఆస్వాదించా. ఇన్నిరోజులు ఇంటి దగ్గరే ఉన్నా.. టీమిండియా ట్రైనర్‌ సూచించిన విధంగా ఫిట్‌నెస్‌ లెవల్స్‌ని మెరుగుపర్చుకున్నాను. అయితే.. చాలా రోజుల గ్యాప్ తర్వాత బౌలింగ్ చేస్తుండటంతో.. రిథమ్ అందుకోవడానికి కొంత సమయం పడుతుంది’’ అని శార్ధూల్ ఠాకూర్ వెల్లడించాడు.