టెస్టులని వన్డేల్లా ఆడటం మెక్‌కలమ్ స్టయిల్: విలియమ్సన్

Share Icons:
న్యూజిలాండ్ మాజీ కెప్టెన్ టెస్టులను వన్డేల్లా భావించి దూకుడుగా బ్యాటింగ్ చేసేవాడని ఆ దేశ ప్రస్తుత కెప్టెన్ కేన్ విలియమ్సన్ వెల్లడించాడు. బంగ్లాదేశ్ క్రికెటర్ తమీమ్ ఇక్బాల్‌తో ఫేస్‌బుక్ లైవ్ సెషన్‌లో మాట్లాడిన విలియమ్సన్.. న్యూజిలాండ్‌ జట్టు అతని కెప్టెన్సీలో సవాళ్లని ఛేదించడం నేర్చుకుందని చెప్పుకొచ్చాడు. 2015 వన్డే ప్రపంచకప్‌లో ఫైనల్ వరకూ ఒంటిచేత్తో న్యూజిలాండ్‌ని గెలిపించుకుంటూ వచ్చిన మెక్‌కలమ్.. ఆస్ట్రేలియాతో జరిగిన తుదిపోరులో డకౌటవడంతో కివీస్ కప్‌ని చేజార్చుకుంది.

Read More:

బ్రెండన్ మెక్‌కలమ్ 50 ఓవర్ల వన్డే మ్యాచ్‌ని కేవలం 40 ఓవర్ల మ్యాచ్‌గా భావించి అప్పట్లో ఆడేవాడట.. ఇక టెస్టులని కూడా వన్డేల్లా భావించి దూకుడుగా ఆడేవాడని తెలిసింది. ఇది నిజమేనా..? అని తమీమ్ ఇక్బాల్ ప్రశ్నించగా.. విలియమ్సన్ సమాధానమిచ్చాడు. ‘‘అవును.. మెక్‌కలమ్ చాలా వేగంగా పరుగులు రాబట్టేవాడు. అతను తన కెరీర్ సాంతం సహజసిద్ధమైన ఆటనే ఆడాడు. ఆ క్రమంలో న్యూజిలాండ్‌కి చిరస్మరణీయమైన విజయాల్ని అందించాడు. ఫార్మాట్ ఏదైనా గ్రేమ్ అప్రోచ్ అతనికి ఓ వరం. అతని కెప్టెన్సీలో ఆడటం ద్వారా నేర్చుకునే అవకాశం నాకు దక్కింది. ఇప్పటికీ న్యూజిలాండ్ సవాళ్లని అలవోకగా ఛేదించగలుగుతుందంటే దానికి కారణం మెక్‌కలమ్ నేర్పిన దూకుడే’’ అని విలియమ్సన్ వెల్లడించాడు.

Read More:

2002లో అంతర్జాతీయ క్రికెట్‌లోకి అరంగేట్రం చేసిన మెక్‌‌కలమ్ 101 టెస్టులు, 250 వన్డేలు, 71 టీ20 మ్యాచ్‌లు ఆడాడు. ఈ క్రమంలో టెస్టుల్లో ఒక ట్రిఫుల్ సెంచరీ, నాలుగు డబుల్ సెంచరీలు బాదిన ఈ కివీస్ మాజీ హిట్టర్.. వన్డేల్లో మాత్రం 5 సెంచరీలే నమోదు చేశాడు. అయినప్పటికీ.. వన్డేల్లో అతని స్ట్రైక్‌రేట్‌ ఏకంగా 96.37‌గా ఉండటం దూకుడికి నిదర్శనం. ఇక ఆడిన 71 టీ20ల్లోనే రెండు సెంచరీలు నమోదు చేసిన మెక్‌కలమ్.. ఏకంగా 136.22 స్ట్రైక్‌రేట్‌తో 2,140 పరుగులు చేశాడు.