టీ20 వరల్డ్‌కప్‌లో భారత్ బోణి అదిరింది.. ఆసీస్ చిత్తు

Share Icons:
ఆస్ట్రేలియా గడ్డపై జరుగుతున్న మహిళల టీ20 ప్రపంచకప్‌లో భారత్ బోణి అదిరింది. సిడ్నీ వేదికగా శుక్రవారం జరిగిన తొలి మ్యాచ్‌లోనే ఆతిథ్య ఆస్ట్రేలియాని 17 పరుగుల తేడాతో భారత్ జట్టు చిత్తుగా ఓడించేసింది. మ్యాచ్‌లో టాస్ ఓడి తొలుత బ్యాటింగ్ చేసిన భారత్ జట్టు 4 వికెట్ల నష్టానికి 132 పరుగులు చేయగా.. లక్ష్య ఛేదనలో ఆస్ట్రేలియా టీమ్ 19.5 ఓవర్లలో 115 పరుగులకే కుప్పకూలిపోయింది. భారత బౌలర్లలో స్పిన్నర్ పూనమ్ యాదవ్ 4 వికెట్లు పడగొట్టగా.. పేసర్ శిఖా పాండే మూడు వికెట్లు, రాజేశ్వర్ ఒక వికెట్ తీశారు.

మ్యాచ్‌లో టాస్ ఓడి తొలుత బ్యాటింగ్ చేసిన భారత్ జట్టుకి మెరుగైన ఆరంభం లభించలేదు. సూపర్ ఫామ్‌లో ఉన్న ఓపెనర్ మంధాన (10) ఆరంభంలోనే వికెట్ చేజార్చుకోగా.. మరో ఓపెనర్ షపాలి వర్మ (29: 15 బంతుల్లో 5×4, 1×6) దూకుడుగా ఆడే ప్రయత్నంలో వికెట్ చేజార్చుకుంది. ఆ తర్వాత వచ్చిన కెప్టెన్ హర్మన్‌ప్రీత్ కౌర్ (2) కూడా తేలిపోవడంతో భారత్ జట్టు తక్కువ స్కోరుకే పరిమితమయ్యేలా కనిపించింది. కానీ.. ఆఖర్లో దీప్తి శర్మ (49 నాటౌట్: 46 బంతుల్లో 3×4) బాధ్యతాయుత ఇన్నింగ్స్ ఆడటంతో భారత్ 132 పరుగులు చేయగలిగింది.

లక్ష్య ఛేదనలో ఆస్ట్రేలియాకి ఓపెనర్ హేలీ (51: 35 బంతుల్లో 6×4, 1×6) హాఫ్ సెంచరీ మెరుపు ఆరంభాన్నివ్వగా.. మిడిలార్డర్‌లో గార్డెనర్ (34: 36 బంతుల్లో 3×4, 1×6) నిలకడగా ఆడింది. దీంతో.. ఆస్ట్రేలియా అలవోకగా గెలిచేలా కనిపించింది. కానీ.. ఇన్నింగ్స్ 12వ ఓవర్‌ వేసిన పూనమ్ యాదవ్ వరుస వికెట్లతో ఆస్ట్రేలియాని ఒత్తిడిలోకి నెట్టగలిగింది. ఆ ఓవర్‌లో రెండు వికెట్లు తీసిన పూనమ్.. 14వ ఓవర్‌లోనూ ఒక వికెట్ పడగొట్టింది. మధ్యలో శిఖాపాండే కూడా జోరు అందుకోవడంతో ఆస్ట్రేలియా చివరి 6 బంతుల్లో 21 పరుగులు చేయాల్సి వచ్చింది. దీంతో.. భారత్ గెలుపు లాంఛనమవగా.. ఆఖరి ఓవర్ వేసిన శిఖా పాండే మూడు పరుగులిచ్చి మిగిలిన రెండు ఆసీస్ వికెట్లు తీసి మ్యాచ్‌ని ముగించింది.