చైనా మొబైల్ కంపెనీతో ధోనీ ఒప్పందం.. ఉతికారేస్తున్న నెటిజన్లు

Share Icons:
ఐపీఎల్ 2020 సీజన్ ముంగిట చెన్నై సూపర్ కింగ్స్ కెప్టెన్ మహేంద్రసింగ్ ధోనీ వివాదంలో చిక్కుకున్నాడు. యూఏఈ వేదికగా సెప్టెంబరు 19 నుంచి నవంబరు 10 వరకూ ఐపీఎల్ 2020 సీజన్ మ్యాచ్‌లు జరగనుండగా.. తొలి మ్యాచ్‌లోనే ముంబయి ఇండియన్స్‌తో అబుదాబి వేదికగా చెన్నై టీమ్ ఢీకొట్టనుంది. అయితే.. తాజాగా చైనాకి చెందిన మొబైల్ కంపెనీ ఒప్పోతో ధోనీ ఒప్పందం కుదుర్చుకోవడం భారత క్రికెట్ అభిమానులకి ఆగ్రహం తెప్పిస్తోంది.

భారత్, చైనా మధ్య నెలకొన్న ఉద్రిక్త పరిస్థితులు కారణంగా తొలుత ఆ దేశానికి చెందిన 59 యాప్‌లపై భారత ప్రభుత్వం నిషేధం విధించగా.. ఐపీఎల్ 2020 సీజన్ టైటిల్ స్ఫాన్సర్‌షిప్ నుంచి చైనాకి చెందిన వివోని భారత క్రికెట్ నియంత్రణ మండలి (బీసీసీఐ) తప్పించేసింది. ఆ తర్వాత కూడా చైనా తీరు మారకపోవడంతో ఇటీవల ఆ దేశానికి చెందిన 224 యాప్‌లపై భారత్ నిషేధం విధించింది. మొత్తంగా ఇప్పుడు భారత్, చైనా మధ్య యుద్ధ వాతావరణం కొనసాగుతోంది. ఇలాంటి పరిస్థితుల్లో చైనాకి చెందిన ఒప్పోతో ధోనీ ఒప్పందం కుదుర్చుకోవడం విమర్శలకి తావిస్తోంది.

గాల్వాన్ లోయ‌లో చైనా సైనికుల దుశ్చర్య కారణంగా 20 మంది భారత సైనికులు వీర మరణం పొందగా.. ఆర్మీలో లెప్ట్‌నెంట్ కల్నల్ (గౌరవ) హోదాలో ఉన్న ధోనీ ఇలా ఆ దేశానికి చెందిన ఒప్పోకి ప్రచారం కల్పించడం తగదని నెటిజన్లు అభిప్రాయపడుతున్నారు. ప్రస్తుత క్లిష్ట పరిస్థితుల్లో ఐపీఎల్‌కి ఉన్న క్రేజ్‌ని క్యాష్ చేసుకునేందుకు.. అదీ ధోనీతో ప్రచారం కల్పిస్తే తిరుగుండదని ఒప్పో భావిస్తోంది. మరి విమర్శలకి ధోనీ తలొగ్గి.. ఒప్పందాన్ని రద్దు చేసుకుంటాడేమో చూడాలి.