చెన్నై సూపర్ కింగ్స్ బ్యాట్స్‌మెన్‌కి మళ్లీ కరోనా పాజిటివ్

Share Icons:
ఐపీఎల్ 2020 సీజన్ ముంగిట కరోనా కష్టాలు కొనసాగుతున్నాయి. ఆగస్టు చివరి వారంలో ఫాస్ట్ బౌలర్ దీపక్ చాహర్, యువ బ్యాట్స్‌మెన్ రుతురాజ్ గైక్వాడ్‌తో పాటు 11 మంది చెన్నై టీమ్ స్టాఫ్ కరోనా వైరస్ బారినపడగా.. ఈ 13 మందినీ 14 రోజుల క్వారంటైన్‌లో ఉంచారు. ఇటీవల ఆ గడువు ముగియగా.. దీపక్ చాహర్‌ కరోనా వైరస్ నుంచి కోలుకుని టీమ్‌తో చేరాడు. కానీ.. రుతురాజ్ గైక్వాడ్‌కి మాత్రం తాజాగా నిర్వహించిన పరీక్షల్లో మళ్లీ కరోనా పాజిటివ్ వచ్చింది.

యూఏఈ వేదికగా సెప్టెంబరు 19 నుంచి నవంబరు 10 వరకూ ఐపీఎల్ 2020 సీజన్ మ్యాచ్‌లు జరగనుండగా.. తొలి మ్యాచ్‌లోనే ముంబయి ఇండియన్స్‌తో అబుదాబి వేదికగా చెన్నై సూపర్ కింగ్స్ తలపడబోతోంది. ఈ నేపథ్యంలో బయో- సెక్యూర్ బబుల్‌లో ఉన్న ఆటగాళ్లు మాత్రమే మ్యాచ్ ఆడనుండగా.. కరోనా వైరస్ పరీక్షల్లో నెగటివ్ వచ్చిన వారికి మాత్రమే ఆ బబుల్‌లోకి ఎంట్రీ ఉంటుంది. తాజాగా కరోనా పాజిటివ్ రావడంతో రుతురాజ్ గైక్వాడ్ క్వారంటైన్‌లోనే ఉండనున్నాడు.

వ్యక్తిగత కారణాలతో వైస్ కెప్టెన్ సురేశ్ రైనా, ఆఫ్ స్పిన్నర్ హర్భజన్ సింగ్ ఐపీఎల్ 2020 సీజన్‌కి దూరమవగా.. వారి స్థానాల్లో ఇప్పటి వరకూ ఎవరినీ చెన్నై సూపర్ కింగ్స్ ఫ్రాంఛైజీ తీసుకోలేదు. దాంతో.. రైనా స్థానంలో మురళీ విజయ్ లేదా రుతురాజ్ గైక్వాడ్‌ని ఆడించాలని చెన్నై టీమ్ మేనేజ్‌మెంట్ ఆశించగా.. రుతురాజ్ ఈ రేసు నుంచి తప్పుకున్నట్లు తెలుస్తోంది. దాంతో.. తొలి మ్యాచ్‌లో రైనా స్థానంలో మురళీ విజయ్ తుది జట్టులో ఆడటం లాంఛనంగా కనిపిస్తోంది.