చిరు టిప్స్: ఖాళీగా ఉన్నాం కదా అని అలాంటి ప్రయోగాలు చేయొద్దు

Share Icons:
మెగాస్టార్ చిరంజీవి సోషల్ మీడియాలోకి అడుగుపెట్టిన సంగతి తెలిసిందే. ఇంత వరకు ఆయన ఏ సోషల్ మీడియా ప్లాట్‌ఫాంలో లేరు. అయితే, తన అభిమానులు, ప్రజలతో ఎప్పటికప్పుడు టచ్‌లో ఉండాలని ఉగాది పర్వదినాన సోషల్ మీడియా అకౌంట్స్ ప్రారంభించారు. ముందుగా ట్విట్టర్‌లో ఉదయం 11 గంటల 11 నిమిషాలకు తొలి ట్వీట్ చేసిన చిరు.. ఆ తరవాత RRR మోషన్ పోస్టర్‌ను ప్రశంసిస్తూ ట్వీట్ చేశారు. ఆ తరవాత ఇన్‌స్టాగ్రామ్‌లో కూడా అకౌంట్‌ను ప్రారంభించారు. తల్లి అంజనాదేవితో తీసుకున్న ఫొటోను తొలి పోస్ట్‌గా పెట్టారు. ఆ తరవాత ఒక వీడియోను పోస్ట్ చేశారు. ఈ వీడియోలో ప్రజలకు పలు సూచనలు చేశారు.

‘‘అందరికీ ఉగాది శుభాకాంక్షలు. అయితే, ఈ పండుగని పండుగలా జరుపుకునే పరిస్థితి లేదు. నేటి ఈ లాక్‌డౌన్ పరిస్థితుల్లో ఇంటిపట్టునే ఉండి కరోనా మహమ్మారి మరింత వ్యాపించకుండా ఉండేలా సహకరించాలని వేడుకుంటున్నాను’’ అని చిరంజీవి అన్నారు. బాధ్యతారాహిత్యంగా బయటకి వచ్చి, కరోనా మరింత వ్యాప్తి చెందడానికి దోహదపడొద్దని ప్రజలను వేడుకున్నారు. పొడిగించిన ఈ లాక్‌డౌన్ సమయంలో మరికొన్ని జాగ్రత్తలు విధిగా పాటించడం అవసరం, ఉత్తమమని కొన్ని టిప్స్ చెప్పారు చిరు.

Also Read:

✪ రోజువారీగా వాడే పచారి సామానులు వీలైనంత తక్కువగా వాడుకుంటూ పొదుపు చేసుకోవాలి.
✪ వేపుళ్ళు, కాలక్షేప తినుబండారాలు లేకుండా చూసుకోవాలి.
✪ అలాగే పాయసం, పరమాన్నం, అరిసెలు లాంటి తీపి పిండివంటలు వదిలేద్దాం.
✪ ఖాళీగా ఉన్నాం కదా కొత్త వంటలు చేద్దాం అనే ఆలోచన గానీ, అలాంటి ప్రయోగాలు కానీ మానుకుందాం.
✪ మన చిన్నతనంలో బామ్మలు, అమ్మమ్మలు, అమ్మ మనకు చేసిపెట్టిన తరహాలో కనీస కూరలతో భోజనం కానిద్దాం.
✪ నిత్యావసర వస్తువుల్ని ఆచితూచి పొదుపుగా వాడుకుందాం.
✪ అలా చెయ్యడం వలన అన్నీ అయిపోయాయి, కొనాలంటే వస్తువులు దొరకడం లేదు అనే కంగారు, ఆందోళన పడే పరిస్థితి రాదు.
✪ ఈ మూడు వారాలకు కావాల్సిన సరుకులు, అవసరం మేరకు మాత్రమే కొని పొందుపరుచుకుందాం.
✪ ఎందుకైనా మంచిది అని అవసరం మీరి కొనడం వలన బయట చిన్న బిడ్డలకు, వృద్ధులకు, అవసరార్ధులకు ఆయా వస్తువులు దొరకక కొరత ఏర్పడవచ్చు.
✪ కనుక పొదుపు ఆచరించి ఇతరుల అవసరాలకు కూడా సహకరిద్దాం.
✪ ఇలా తగ్గించి వాడడం ద్వారా ఇంట్లో చెత్త కూడా ఎక్కువగా పేరుకుపోదు.
✪ తద్వారా వీధిలోని చెత్త కూడా పేరుకుపోదు, ఇలా పారిశుద్ధ్యానికి సహకరిద్దాం.
✪ మన భారతీయులం ఒక్కటై రోజు రోజుకి పెరుగుతున్న ఈ వైరస్ వ్యాప్తిని పెరగనివ్వకుండా నివారిద్దాం.. నేలమట్టం చేద్దాం.
✪ ఈ లాక్ డౌన్ ప్రకటించిన మన ప్రధాని నరేంద్ర మోదీ గారికి, సహకరిస్తున్న రెండు తెలుగు రాష్ట్రాల ప్రభుత్వాలకు నా అభినందనలు, ధన్యవాదాలు.
✪ ఈ సమయంలో ఇంటిపట్టునే ఉండి ఆరోగ్యంగా ఉందాం.. ఆరోగ్యం పంచుదాం..
జైహింద్.