కోహ్లీ ఆ మార్పు అవసరమా..?: భజ్జీ మండిపాటు

Share Icons:
ఆస్ట్రేలియాతో వాంఖడే వేదికగా మంగళవారం జరిగిన తొలి వన్డేలో భారత కెప్టెన్ తన బ్యాటింగ్ స్థానాన్ని మార్చుకోవడంపై విమర్శలపర్వం కొనసాగుతోంది. ఓపెనర్ కేఎల్ రాహుల్‌ని బ్యాటింగ్ ఆర్డర్‌లో మూడో స్థానంలో ఆడించడం కోసం.. నెం.4లోకి మారిన విరాట్ కోహ్లీ 14 బంతుల్లో 16 పరుగులు చేసి ఔటయ్యాడు. కోహ్లీ బ్యాటింగ్ ఆర్డర్ మార్పే టీమిండియా ఓటమికి ప్రధాన కారణమని ఇప్పటికే భారత మాజీ క్రికెటర్లు వీవీఎస్ లక్ష్మణ్, సంజయ్ మంజ్రేకర్.. ఆస్ట్రేలియా మాజీ ఓపెనర్ మాథ్యూ హెడెన్, పాకిస్థాన్ మాజీ ఫాస్ట్ బౌలర్ షోయబ్ అక్తర్ విమర్శలు గుప్పించగా.. తాజాగా ఈ జాబితాలో హర్భజన్ సింగ్ కూడా చేరాడు.

Read More:

‘భారత్ తరఫున వన్డేల్లో నెం.3లో బ్యాటింగ్ చేసి ఎన్నో మ్యాచ్‌ల్ని విరాట్ కోహ్లీ గెలిపించాడు. వాంఖడే వన్డేలో అతను తన బ్యాటింగ్ స్థానాన్ని మార్చుకోవాల్సిన అవసరం లేదు’ అని హర్భ‌జన్ సింగ్ అభిప్రాయపడ్డాడు. నెం.3లో బ్యాటింగ్ చేసిన రాహుల్ 47 పరుగులు చేసి ఔటవగా.. నెం.5లో ఆడిన శ్రేయాస్ అయ్యర్ 4 పరుగుల వద్దే వికెట్ చేజార్చుకున్నాడు. రాహుల్‌ కోసం చేసిన మార్పులు కారణంగా నెం.4లో గత కొంతకాలంగా నిలకడగా రాణిస్తున్న శ్రేయాస్ కూడా నెం.5లో ఆడి ఫెయిలవడం భారత్‌ని దెబ్బతీసింది.

మ్యాచ్‌లో టాస్ ఓడి మొదట బ్యాటింగ్ చేసిన భారత్ జట్టు 49.1 ఓవర్లలో 255 పరుగులకి ఆలౌటవగా.. అనంతరం లక్ష్యాన్ని ఆస్ట్రేలియా వికెట్ నష్టపోకుండానే 37.4 ఓవర్లలోనే ఛేదించేసింది. కెప్టెన్‌ విరాట్ కోహ్లీకి వన్డేల్లో ఇలా 10 వికెట్ల తేడాతో పరాజయం ఎదురవడం ఇదే ఫస్ట్ టైమ్‌కాగా.. ఆస్ట్రేలియా చేతిలో భారత్ ఇలా వన్డేల్లో ఓడటం కూడా ఇదే మొదటిసారి.