కోహ్లీకి భయమే లేదు.. అతని బౌలింగ్‌లోనే సిక్స్ కొట్టేశాడు: భజ్జీ

Share Icons:
రాయల్ ఛాలెంజర్స్ బెంగళూరు కెప్టెన్‌ విరాట్ కోహ్లీ‌లో అస్సలు భయం కనిపించదని.. తనని ఫస్ట్ మ్యాచ్‌లోనే అతను ఆకట్టుకున్నట్లు చెన్నై సూపర్ కింగ్స్ స్పిన్నర్ హర్భజన్ సింగ్ వెల్లడించాడు. యూఏఈ వేదికగా సెప్టెంబరు 19 నుంచి నవంబరు 10 వరకూ ఐపీఎల్ 2020 సీజన్ మ్యాచ్‌లు జరగనుండగా.. వ్యక్తిగత కారణాలతో ఈ ఏడాది టోర్నీకి హర్భజన్ సింగ్ దూరమయ్యాడు. దాంతో.. భారత్‌లో ఉన్న భజ్జీ స్టార్‌ స్పోర్ట్స్ షోలో మాట్లాడుతుండగా.. గురించి చర్చ వచ్చింది. ఐపీఎల్ ఆరంభ సీజన్ 2008 నుంచి బెంగళూరు తరఫునే కోహ్లీ మ్యాచ్‌లు ఆడుతుండగా.. పదేళ్లపాటు ముంబయి ఇండియన్స్ టీమ్‌కి ఆడిన హర్భజన్ సింగ్ 2018లో చెన్నై సూపర్ కింగ్స్ జట్టులోకి మారిన విషయం తెలిసిందే.

‘‘ఐపీఎల్ ఆరంభ సీజన్ వేలానికి ముందు విరాట్ కోహ్లీ పేరుని మాజీ క్రికెటర్ లాల్‌చంద్ రాజ్‌పుత్ ద్వారా విన్నాను. ఆ ఏడాది బెంగళూరు, ముంబయి మధ్య మ్యాచ్ జరగగా.. కెప్టెన్ సచిన్ టెండూల్కర్ ఆ మ్యాచ్‌కి దూరమయ్యాడు. దాంతో.. ముంబయి కెప్టెన్‌గా నేను వ్యవహరించాను. మ్యాచ్ మధ్యలో సనత్ జయసూర్య (శ్రీలంక దిగ్గజం) బౌలింగ్‌కిరాగా.. విరాట్ కోహ్లీ క్రీజు వెలుపలికి వచ్చి మరీ సిక్స్ బాదేశాడు. ఆ టైమ్‌లో కోహ్లీ తనకి బౌలింగ్ చేస్తోంది గొప్ప ఆటగాడనే విషయాన్ని పట్టించుకోలేదు. అతనిలో ఆ భయం ఇసుమంత కూడా కనిపించలేదు. కోహ్లీకి మంచి భవిష్యత్ ఉంటుందని అప్పుడే ఊహించా’’ అని హర్భజన్ సింగ్ వెల్లడించాడు.

ఐపీఎల్‌లో ఇప్పటి వరకూ 12 సీజన్లు ముగియగా.. 177 మ్యాచ్‌లాడిన విరాట్ కోహ్లీ 5,412 పరుగులతో టాప్ స్కోరర్‌గా కొనసాగుతున్నాడు. ఇందులో ఐదు సెంచరీలు ఉండగా.. 36 హాఫ్ సెంచరీలు ఉన్నాయి. కానీ.. అతను కెప్టెన్సీ వహిస్తున్న రాయల్ ఛాలెంజర్స్ బెంగళూరు మాత్రం ఇప్పటి వరకూ ఒక్కసారి కూడా టైటిల్ గెలవలేదు.