కరోనా ఎఫెక్ట్.. ఐసీసీ క్వాలిఫయర్ మ్యాచ్‌లు వాయిదా

Share Icons:
ప్రపంచ వ్యాప్తంగా కరోనా వైరస్ వేగంగా వ్యాప్తి చెందుతుండటంతో ముందస్తు జాగ్రత్త చర్యల్లో భాగంగా అంతర్జాతీయ క్రికెట్ కౌన్సిల్ (ఐసీసీ).. క్వాలిఫయర్స్ మ్యాచ్‌లన్నింటినీ జూన్ ఆఖరి వరకూ రద్దు చేసింది. ఆస్ట్రేలియా వేదికగా ఈ ఏడాది అక్టోబరులో టీ20 వరల్డ్‌కప్ జరగనుండగా.. వచ్చే ఏడాది టీ20 ప్రపంచకప్‌కి, అలానే 2023లో జరిగే వన్డే ప్రపంచకప్‌కి కూడా భారత్ ఆతిథ్యమిస్తోంది. దీంతో.. ఈ టోర్నీలకి సంబంధించిన క్వాలిఫయర్స్ మ్యాచ్‌లు ఏప్రిల్ 16 నుంచి ప్రారంభంకావాల్సి ఉండగా.. ఇప్పుడు జూన్ ఆఖరి వరకూ జరిగే మ్యాచ్‌లన్నింటినీ వాయిదా వేసింది.

‘‘కరోనా వైరస్ కారణంగా అన్ని దేశాల ప్రభుత్వాలు లాక్‌డౌన్ ప్రకటిస్తూ.. కఠిన నిర్ణయాలు తీసుకుంటున్నాయి. ఈ నేపథ్యంలో.. ఆటగాళ్లు, అభిమానుల ఆరోగ్యాన్ని పరిగణలోకి తీసుకుని.. ఏప్రిల్ నుంచి జూన్ ఆఖరి వరకూ జరిగే క్వాలిఫయర్ మ్యాచ్‌లను వాయిదా వేయాలని ఐసీసీ నిర్ణయించింది. జులైలో పరిస్థితుల్ని సమీక్షించి షెడ్యూల్‌ని రూపొందిస్తాం’’ అని ఐసీసీ ఈవెంట్స్ హెడ్ క్రిస్ టెట్లీ తెలిపాడు.

కరోనా వైరస్ వ్యాప్తి కారణంగా మార్చి 29 నుంచి ప్రారంభంకావాల్సిన ఐపీఎల్ 2020 సీజన్‌ని భారత క్రికెట్ నియంత్రణ మండలి (బీసీసీఐ) ఇప్పటికే ఏప్రిల్ 15కి వాయిదా వేయగా.. పాకిస్థాన్ క్రికెట్ బోర్డు (పీసీబీ) కూడా పాకిస్థాన్ సూపర్ లీగ్‌‌ని సెమీస్ దశలోనే రద్దు చేసింది. ఇక ఇంగ్లాండ్ వేల్స్ క్రికెట్ బోర్డు.. దేశంలో మే ఆఖరి వరకూ ఎలాంటి క్రికెట్ మ్యాచ్‌లను నిర్వహించబోమని ప్రకటించింది.