ఐపీఎల్ 2020 షెడ్యూల్‌పై సౌరవ్ గంగూలీ క్లారిటీ

Share Icons:
సీజన్‌ షెడ్యూల్‌పై భారత క్రికెట్ నియంత్రణ మండలి (బీసీసీఐ) అధ్యక్షుడు సౌరవ్ గంగూలీ క్లారిటీ ఇచ్చాడు. ఇప్పటికే ప్రకటించిన షెడ్యూల్ ప్రకారం మార్చి 29 నుంచి ఐపీఎల్ 2020 సీజన్ ప్రారంభంకావాల్సి ఉండగా.. కరోనా వైరస్ కారణంగా తొలుత ఏప్రిల్ 15కి టోర్నీని వాయిదా వేసిన బీసీసీఐ.. లాక్‌డౌన్‌ని ప్రభుత్వం పొడిగించడంతో ఐపీఎల్‌ని నిరవధికంగా వాయిదా వేసేసింది.

ఆస్ట్రేలియా వేదికగా అక్టోబరు 18 నుంచి ప్రారంభంకావాల్సిన టీ20 వరల్డ్‌కప్‌ని కరోనా వైరస్ కారణంగా ఐసీసీ వాయిదావేయాలని ప్రాథమికంగా నిర్ణయించడంతో.. అక్టోబరు – నవంబరు విండోలో ఐపీఎల్‌ని నిర్వహించాలని బీసీసీఐ యోచిస్తున్నట్లు వార్తలు వచ్చాయి. ఆ మేరకు షెడ్యూల్‌పై కూడా బీసీసీఐ ఓ క్లారిటీకి వచ్చినట్లు కథనాలు వెలువడ్డాయి. దాంతో.. ఆ వార్తలపై తాజాగా గంగూలీ స్పందించాడు.

‘‘ఐపీఎల్ 2020 సీజన్‌ గురించి ఇప్పుడే మాట్లాడటం తొందరపాటు అవుతుంది. భారత్‌లోనే టోర్నీ జరిగే అవకాశం ఉంది. కానీ.. అప్పటిలోపు పరిస్థితులు అదుపులోకి రావాలి. సురక్షిత వాతావరణంలో మాత్రమే టోర్నీని నిర్వహిస్తాం. కానీ.. ఇప్పటి వరకూ ఐపీఎల్ 2020 సీజన్ షెడ్యూల్ గురించి మాత్రం అధికారికంగా బీసీసీఐలో చర్చ జరగలేదు’’ అని సౌరవ్ గంగూలీ స్పష్టం చేశాడు.

భారత్‌లో సోమవారం రాత్రికి కరోనా వైరస్ పాజిటివ్ కేసుల సంఖ్య రెండు లక్షలకి చేరువకాగా.. ఇప్పట్లో పరిస్థితులు అదుపులోకి వచ్చే సూచనలు కనిపించడం లేదు. దాంతో.. ఐపీఎల్ 2020 సీజన్‌కి తాము ఆతిథ్యమిస్తామని ఇప్పటికే శ్రీలంక, యూఏఈ ముందుకు వచ్చాయి. కానీ.. బీసీసీఐ మాత్రం వారి ప్రతిపాదన గురించి స్పందించలేదు.