ఐపీఎల్ 2020 ఫైనల్ మంగళవారం ఎందుకు? ఎవరి ఒత్తిడికి బీసీసీఐ తలొగ్గింది?

Share Icons:
సెప్టెంబర్ 19న ప్రారంభమైన ఐపీఎల్ 2020 నేడు (నవంబర్ 10న) జరిగే ఫైనల్‌తో ముగియనుంది. వాస్తవానికి ఐపీఎల్ మార్చి చివర్లోనే ప్రారంభం కావాల్సింది. కానీ కరోనా కారణంగా సెప్టెంబర్‌కు వాయిదా పడింది. ఇండియా నుంచి వేదికను యూఏఈకి మార్చి.. బయో బబుల్‌లో మ్యాచ్‌లను నిర్వహించారు.

ఫైనల్ చేరిన ముంబై ఇండియన్స్, ఢిల్లీ క్యాపిటల్స్ కప్ కోసం అమీతుమీ తేల్చుకోనున్నాయి. గత ఐపీఎల్ ఫైనల్స్‌తో పోలిస్తే.. ఈ సీజన్ ఫైనల్ ఎంతో విభిన్నమైంది. ఈ సీజన్లో లీగ్ దశలో మాదిరిగానే ఫైనల్ మ్యాచ్‌కు సైతం ఫ్యాన్స్‌కు స్టేడియంలోకి అనుమతి లేదు. టైటిల్ గెలిచిన జట్టు ప్రైజ్ మనీని సైతం రూ.20 కోట్ల నుంచి రూ.10 కోట్లకు తగ్గించారు. రన్నరప్‌గా నిలిచిన జట్టుకు ఇది వరకు రూ. 12.50 కోట్లు ప్రైజ్ మనీ ఇవ్వగా.. ఈసారి రూ.6.35 కోట్లు మాత్రమే ఇవ్వనున్నారు.

ఐపీఎల్ చరిత్రలో తొలిసారి ఫైనల్ మ్యాచ్ వారం మధ్యలో జరుగుతోంది. గతంలో 11 ఫైనల్స్ ఆదివారం జరగ్గా.. 2011లో మాత్రం శనివారం నిర్వహించారు. ఈసారి వీకెండ్‌లో నిర్వహించకపోవడానికి కారణం ఉంది. వచ్చే వారం దీపావళి పండుగ ఉండటంతో.. ఫెస్టివల్ సీజన్లో వచ్చే యాడ్స్‌ను ఎక్కువగా పొందడం కోసం.. తద్వారా ఆదాయం పొందడం కోసం బ్రాడ్‌కాస్టర్ స్టార్ ఇండియా బీసీసీఐపై ఒత్తిడి తెచ్చింది. దీంతో ఆదివారానికి బదులు మంగళవారం ఫైనల్ నిర్వహిస్తున్నారు. ముందుగా 51 రోజులకే టోర్నీని ముగించాలని భావించగా.. దీపావళిని దృష్టిలో ఉంచుకొని 54 రోజులకు పొడిగించారు.