ఐపీఎల్ 2020 తొలి మ్యాచ్‌కి CSK ఓపెనర్ దూరం..?

Share Icons:
ఐపీఎల్ 2020 సీజన్ మ్యాచ్‌లు శనివారం నుంచి ప్రారంభంకానుండగా.. తొలి మ్యాచ్‌లోనే ముంబయి ఇండియన్స్‌తో అబుదాబి వేదికగా చెన్నై సూపర్ కింగ్స్ తలపడనుంది. ఈ ఫస్ట్ మ్యాచ్‌కి చెన్నై సూపర్ కింగ్స్ యువ ఓపెనర్ రుతురాజ్ గైక్వాడ్ దూరంగా ఉండబోతున్నాడు. ఆగస్టు చివరి వారంలో కరోనా వైరస్ బారినపడిన రుతురాజ్‌కి ఇటీవల మరోసారి పరీక్షలు నిర్వహించగా.. మళ్లీ పాజిటివ్ వచ్చింది. దాంతో.. అతడ్ని క్వారంటైన్‌లోనే ఉంచి చికిత్స అందిస్తున్నారు.

వాస్తవానికి చెన్నై సూపర్ కింగ్స్‌ జట్టులో రుతురాజ్ గైక్వాడ్‌తో పాటు ఫాస్ట్ బౌలర్ దీపక్ చాహర్, 11 మంది టీమ్ స్టాఫ్ కరోనా వైరస్ బారినపడ్డారు. కానీ.. ఇందులో చాహర్‌తో పాటు 11 మంది స్టాఫ్ మెంబర్స్ కోలుకోగా.. ఒక్క రుతురాజ్ మాత్రం ఇంకా పూర్తి స్థాయిలో కోలుకోలేదు. వ్యక్తిగత కారణాలతో స్టార్ బ్యాట్స్‌మెన్ సురేశ్ రైనా ఐపీఎల్ 2020 సీజన్ నుంచి తప్పుకోగా.. అతని స్థానంలో రుతురాజ్‌ని ఆడించాలని చెన్నై టీమ్ మేనేజ్‌మెంట్ ఆశించింది. కానీ.. తాజాగా అతను ఫిట్‌నెస్ సాధించలేకపోవడంతో మురళీ విజయ్‌కి ఆ స్థానం దక్కబోతోంది.

ఐపీఎల్‌లో గెలుపోటములతో సంబంధం లేకుండా ఒకే టీమ్‌ని కొనసాగించడం కెప్టెన్ మహేంద్రసింగ్ ధోనీ స్టయిల్. కొన్ని సార్లు బ్యాట్స్‌మెన్‌లు లేదా బౌలర్లు విఫలమైనా.. వారిపై వెంటనే వేటు వేయకుండా తగినన్ని అవకాశాల్ని ధోనీ ఇస్తుంటాడు. దాంతో.. తొలి మ్యాచ్‌కి దూరమవుతున్న రుతురాజ్ గైక్వాడ్.. మళ్లీ జట్టులోకి రావడం కొంచెం కష్టమే.