ఐపీఎల్ 2020కి తెలుగులో కామెంటేటర్‌గా ఎమ్మెస్కే.. లిస్ట్‌లో మరో ఏడుగురు

Share Icons:
ఐపీఎల్ 2020 సీజన్ యూఏఈ వేదికగా సెప్టెంబరు 19 నుంచి ప్రారంభంకాబోతోంది. అబుదాబి, దుబాయ్, షార్జా వేదికల్లో 53 రోజుల పాటు నిర్వహించనున్న ఈ సుదీర్ఘ టోర్నీలో మొత్తం 60 మ్యాచ్‌లు జరగబోతున్నాయి. ఈ నేపథ్యంలో.. ఐపీఎల్ బ్రాడ్‌కాస్టర్ స్టార్ స్పోర్ట్స్ ఇంగ్లీష్, హిందీ, తెలుగు, తమిళంలో కామెంట్రీ చెప్పే వ్యాఖ్యాతల జాబితాని విడుదల చేసింది. భారత క్రికెట్ నియంత్రణ మండలి (బీసీసీఐ) కామెంట్రీ ఫ్యానల్‌ నుంచి వేటుకి గురైన సంజయ్ మంజ్రేకర్‌‌ని పక్కనపెట్టిన స్టార్‌ స్పోర్ట్స్.. తెలుగు కామెంటేటర్ జాబితాలో టీమిండియా మాజీ చీఫ్ సెలెక్టర్ ఎమ్మెస్కే ప్రసాద్‌‌కి చోటిచ్చింది. అలానే మరో మాజీ చీఫ్ సెలక్టర్ క్రిస్ శ్రీకాంత్‌ కూడా తమిళంలో కామెంట్రీ చెప్పుబోతున్నాడు.

ఐపీఎల్ 2020కి తెలుగులో కామెంట్రీ చెప్పబోయేది వీరే: ఎం. ఆనంద్ శ్రీ కృష్ణ, ఎం. నేహా, కౌశిక్ నలన్ చక్రవర్తి, ఎం. ఆశిష్ రెడ్డి, వెంకటపతి రాజు, వై. వేణుగోపాలరావు, ఎమ్మెస్కే ప్రసాద్, డి. కళ్యాణ్ కృష్ణ

ఐపీఎల్ గత సీజన్లతో పోలిస్తే అరగంట ముందే ఈ ఏడాది మ్యాచ్‌లు ప్రారంభంకానున్నాయి. అంటే.. రాత్రి 8 గంటలకి ప్రారంభమయ్యే మ్యాచ్‌లు 7.30కి స్టార్ట్ కానుండగా.. వీకెండ్స్‌లో రోజుకి రెండు మ్యాచ్‌లు ఉన్నప్పుడు మధ్యాహ్నం మ్యాచ్‌లు 4 గంటలకి కాకుండా 3.30కే ప్రారంభంకానున్నాయి. కరోనా వైరస్ వ్యాప్తి నేపథ్యంలో ఖాళీ స్టేడియాల్లో ఐపీఎల్ మ్యాచ్‌లు జరగనుండటంతో టీవీ వ్యూవర్‌షిప్ ఈసారి భారీగా పెరిగే అవకాశం ఉందని స్టార్‌ స్పోర్ట్స్ ధీమాతో ఉంది.