ఐపీఎల్‌లో నెం.1 రికార్డ్‌ ముంగిట రవీంద్ర జడేజా

Share Icons:
చెన్నై సూపర్ కింగ్స్ స్టార్ ఆల్‌రౌండర్ ఐపీఎల్‌ 2020 సీజన్‌లో ఓ అరుదైన రికార్డ్‌ని అందుకోబోతున్నాడు. యూఏఈ వేదికగా సెప్టెంబరు 19 నుంచి నవంబరు 10 వరకూ ఐపీఎల్ 2020 సీజన్ మ్యాచ్‌లు జరగనుండా.. తొలి మ్యాచ్‌లోనే ముంబయి ఇండియన్స్‌తో అబుదాబి వేదికగా చెన్నై టీమ్ తలపడబోతోంది.

ఐపీఎల్ ఆరంభ సీజన్ 2008 నుంచి రాజస్థాన్ రాయల్స్ తరఫున ఆడిన రవీంద్ర జడేజాని.. 2012 ఐపీఎల్ సీజన్ ఆటగాళ్ల వేలంలో రూ. 9.72 కోట్లకి చెన్నై సూపర్ కింగ్స్ ఫ్రాంఛైజీ కొనుగోలు చేసింది. ఇక అక్కడి నుంచి జడేజా వెనుదిరిగి చూసుకోవాల్సిన అవసరం లేకపోయింది. చెన్నై టీమ్‌లో అగ్రశ్రేణి ఆటగాడిగా ఎదిగిన జడేజా.. ఇప్పటి వరకూ 170 మ్యాచ్‌లాడి 1,927 పరుగులు, 108 వికెట్లు పడగొట్టాడు.

ఐపీఎల్ 2020 సీజన్‌లో జడేజా మరో 73 పరుగులు చేస్తే.. టోర్నీ చరిత్రలో 2,000 పరుగులు, 100 వికెట్ల మైలురాయిని అందుకున్న తొలి ఆల్‌రౌండర్‌గా సరికొత్త రికార్డ్‌ నెలకొల్పనున్నాడు. జడేజా తర్వాత స్థానంలో చెన్నై టీమ్‌కే చెందిన షేన్ వాట్సన్ 3,575 పరుగులు, 92 వికెట్లతో ఉండగా.. ఐపీఎల్ 2019 సీజన్‌లో కనీసం ఒక్క ఓవర్‌ కూడా వాట్సన్ బౌలింగ్ చేయలేదు. ఇక మూడో స్థానంలోనూ చెన్నైకి చెందిన ఆల్‌రౌండర్ డ్వేన్ బ్రావో 1,483 పరుగులు, 147 వికెట్లతో ఉండటం గమనార్హం.