ఐపీఎల్‌కి షారూక్ ఖాన్.. పీఎస్‌ఎల్‌కి నేను: అక్తర్

Share Icons:
ఇండియన్ ప్రీమియర్ లీగ్ (ఐపీఎల్) ఇంతలా ప్రాచుర్యం పొందడానికి బాలీవుడ్ బాద్‌షా షారూక్ ఖాన్ కారణమని పాకిస్థాన్ మాజీ ఫాస్ట్ బౌలర్ అభిప్రాయపడ్డాడు. పాకిస్థాన్ సూపర్ లీగ్‌ (పీఎస్‌ఎల్)లో ఆడించేందుకు ఓ జట్టుని కొనుగోలు చేయాలని ఆశిస్తున్న షోయబ్ అక్తర్.. పీఎస్‌ఎల్‌లోకి తన ఫ్రాంఛైజీని భాగస్వామిగా చేస్తే ఐపీఎల్ తరహాలో టోర్నీకి ఆదరణ తెచ్చిపెడతానని ధీమా వ్యక్తం చేస్తున్నాడు. కరోనా వైరస్ కారణంగా ఇటీవల పీఎస్‌ఎల్ టోర్నీ సెమీస్ దశలోనే రద్దవగా.. మార్చి 29 నుంచి ప్రారంభంకావాల్సిన ఐపీఎల్ 2020 సీజన్ ఏప్రిల్ 15కి వాయిదా పడిన విషయం తెలిసిందే.

Read More:

‘‘పాకిస్థాన్ క్రికెట్ బోర్డు.. పీఎస్‌ఎల్‌లో కొత్తగా మరో రెండు టీమ్స్‌ని ఆడించాలని ప్రణాళికలు రచిస్తోంది. ఒకవేళ నా టీమ్ పీఎస్‌ఎల్‌లోకి ఎంట్రీ ఇస్తే..? కచ్చితంగా టోర్నీకి ఆదరణ మరింత పెరుగుతోంది. ఎందుకంటే..? పాకిస్థాన్‌లో కాకుండా విదేశాల్లోనూ నన్ను అభిమానించే వారు ఉన్నారు. చాలా మందికి నేను తెలుసు. కాబట్టి.. పీఎస్‌ఎల్ బ్రాండ్ వాల్యూ కూడా పెరుగుతుంది. అలానే టోర్నీలో పెట్టుబడి పెట్టేందుకు పెద్ద వ్యాపార సంస్థలు ముందుకు వస్తాయి. ఉదాహరణకి బాలీవుడ్ హీరో షారూక్ ఖాన్ కారణంగానే ఐపీఎల్ వాల్యూ పెరిగింది. ఆ తరహాలోనే పీఎస్‌ఎల్ ఆదరణని నేను పెంచుతా’’ అని షోయబ్ అక్తర్ ధీమా వ్యక్తం చేశాడు.

Read More :

ఐపీఎల్‌లో కోల్‌కతా నైట్‌రైడర్స్‌ టీమ్‌‌కి సహ యజమానిగా ఉన్న షారూక్ ఖాన్.. టోర్నీలో ఆ జట్టు ఆడే మ్యాచ్‌లకి తరచూ హాజరవుతుంటాడు. దీంతో.. అతనితో పాటు బాలీవుడ్ నటులు కూడా స్టేడియాలకి వచ్చి మ్యాచ్‌లను వీక్షిస్తూ.. అభిమానుల్ని అలరిస్తుంటారు. అయితే.. ఐపీఎల్‌లోనే కాకుండా కరీబియన్ ప్రీమియర్ లీగ్‌(సీపీఎల్)లోనూ ఓ జట్టుని షారూక్ ఖాన్ కొనుగోలు చేశాడు. కానీ.. ఐపీఎల్ తరహాలో సీపీఎల్ పాపులర్ కాలేదు. దీంతో.. కేవలం షారూక్ ఖాన్ కారణంగానే ఐపీఎల్‌కి ఆదరణ పెరగలేదని షోయబ్ అక్తర్‌కి భారత అభిమానులు చురకలేస్తున్నారు.