ఏపీలో ఉత్కంఠ.. ఆ 60 రిపోర్టుల్లో ఏముందో..?

Share Icons:
కరోనా వైరస్‌ ()పై ఏపీ ప్రభుత్వం ఆదివారం ఉదయం బులెటిన్‌ విడుదల చేసింది. రాష్ట్రంలో ఇప్పటి వరకు 19 కరోనా కేసులు నమోదయ్యాయని, ఇవాళ ఒక్క కేసు కూడా నమోదు కాలేదని వైద్య ఆరోగ్య శాఖ వెల్లడించింది. విశాఖపట్నం, గుంటూరు, కృష్ణా జిల్లాల్లో నాలుగు కరోనా కేసుల చొప్పున, ప్రకాశం జిల్లాలో మూడు, కర్నూలు, నెల్లూరు, చిత్తూరు జిల్లాల్లో ఒక్కొక్కరు చొప్పున కరోనా బాధితులు ఉన్నారని అధికారులు వెల్లడించారు.

ఆదివారం పరీక్షించిన 16 నమూనాలు నెగిటివ్‌గా నిర్ధారణ అయ్యాయని, 60 మంది నమూనాల ఫలితాల కోసం వేచిచూస్తున్నట్లు వైద్యులు తెలిపారు. విదేశాల నుంచి వచ్చిన 29,367 మందిని హోమ్‌ ఐసోలేషన్‌లో ఉంచి పర్యవేక్షిస్తున్నట్లు చెప్పారు. అలాగే 195 మందిని ఆసుపత్రిలో చేర్చి పర్యవేక్షిస్తున్నారు.

కరోనా కట్టడికి ఏపీ ప్రభుత్వం పటిష్టమైన చర్యలు చేపడుతోంది. జనాలను ఇళ్లలో నుంచి రానివ్వకుండా.. క్వారంటైన్‌లో ఉన్నవాళ్లు, విదేశాల నుంచి వచ్చిన వారిపై ప్రత్యేకంగా నిఘా పెట్టింది. ఇక లాక్‌డౌన్ సమయంలో జనాలు ఇళ్లలో నుంచి ఎప్పుడంటే అప్పుడు బయటకు రాకుండా చర్యలు మొదలు పెట్టేందుకు సిద్ధమైంది. ఇక రాష్ట్రవ్యాప్తంగా నగరాలు, పట్టణాల్లో నిత్యావసరాల కొనుగోలుకు ఉదయం 11 వరకే అనుమతిస్తున్నట్లు ప్రభుత్వం ప్రకటించింది. గ్రామాల్లో మాత్రం మధ్యాహ్నం ఒంటి గంట వరకు అనుమతి ఇస్తున్నట్లు పేర్కొంది.