ఏం ఫిట్‌నెస్ రిషబ్ పంత్ అంకుల్..! ఉతికారేస్తున్న నెటిజన్లు

Share Icons:
ఐపీఎల్ 2020 సీజన్‌లో పేలవ ఫామ్‌లో విమర్శలు ఎదుర్కొంటున్న ఢిల్లీ క్యాపిటల్స్ యువ వికెట్ కీపర్/ బ్యాట్స్‌మెన్ రిషబ్ పంత్.. తొడ కండరాల గాయం కారణంగా గత రెండు మ్యాచ్‌ల్లోనూ ఆడలేదు. రాజస్థాన్ రాయల్స్‌‌తో గత శుక్రవారం షార్జా వేదికగా జరిగిన మ్యాచ్‌లో కీపింగ్ చేస్తుండగా.. రిషబ్ పంత్‌ గాయపడ్డాడు. అయినప్పటికీ.. మ్యాచ్ చివరి వరకూ అసౌకర్యంగానే కీపింగ్ చేసిన పంత్‌కి కనీసం 7-10 రోజులు విశ్రాంతి అవసరమని వైద్యులు సూచించారు. దాంతో.. గత ఆదివారం ముంబయి ఇండియన్స్‌తో ఆ తర్వాత బుధవారం మళ్లీ రాజస్థాన్ రాయల్స్‌తో జరిగిన మ్యాచ్‌కి ఈ హిట్టర్ దూరమయ్యాడు.

వాస్తవానికి రాజస్థాన్ రాయల్స్‌‌తో గత బుధవారం మ్యాచ్‌కి ముందు రిషబ్ పంత్ గాయం నుంచి కోలుకుని ఫిట్‌నెస్ సాధించినట్లు కనిపించాడు. మ్యాచ్‌కి ముందు జరిగిన వార్మప్ సెషన్‌లో టీమ్ ఫిజియో పర్యవేక్షణలో పంత్ మైదానంలో పరుగెత్తుతూ కనిపించాడు. కానీ.. అతను మ్యాచ్‌కి అవసరమైన ఫిట్‌నెస్ సాధించలేదని తేల్చిన ఢిల్లీ టీమ్‌ మేనేజ్‌మెంట్.. పంత్ స్థానంలో ఆస్ట్రేలియాకి చెందిన వికెట్ కీపర్ అలెక్స్ క్యారీని తీసుకుంది. ఈ మ్యాచ్‌లో ఢిల్లీ 13 పరుగుల తేడాతో విజయం సాధించింది.

ఫిట్‌నెస్ టెస్టులో భాగంగా మైదానంలో రిషబ్ పంత్ పరుగెత్తుతున్న వీడియోని ఐపీఎల్ సోషల్ మీడియాలో షేర్ చేయగా.. పంత్ అధిక బరువుపై నెటిజన్లు పెద్ద ఎత్తున సెటైర్లు పేలుస్తున్నారు. అమిత్ మిశ్రా తరహాలో పొట్ట పెంచావంటూ కొందరు చురకలు వేస్తుండగా.. మరికొందరు అంకుల్‌లా కనిపిస్తున్నావంటూ మొట్టికాయలు వేస్తున్నారు. వాస్తవానికి లాక్‌డౌన్ ముందు వరకూ రిషబ్ పంత్ మెరుగైన ఫిట్‌నెస్‌తో కనిపించాడు. కానీ.. కరోనా వైరస్ వ్యాప్తి కారణంగా లభించిన బ్రేక్ సమయంలో ఫిట్‌నెస్‌పై పంత్ అశ్రద్ధ కనబర్చినట్లు తెలుస్తోంది. చెన్నై సూపర్ కింగ్స్‌తో షార్జా వేదికగా శనివారం రాత్రి ఢిల్లీ క్యాపిటల్స్ తన తర్వాత మ్యాచ్ ఆడనుండగా.. ఈ మ్యాచ్‌‌తో పంత్ రీఎంట్రీ ఇచ్చే సూచనలు కనిపిస్తున్నాయి.