ఆసియా టీమ్‌లో కోహ్లీ, ధావన్.. రోహిత్ ఔట్

Share Icons:
బంగ్లాదేశ్ గడ్డపై మార్చి నెలలో ఆసియా ఎలెవన్, వరల్డ్‌ ఎలెవన్ టీమ్స్ మధ్య జరిగే రెండు టీ20ల సిరీస్‌‌లో ఆడే భారత్ క్రికెటర్లు ఎవరో తేలిపోయింది. మార్చి 18, 21న ఈ మ్యాచ్‌లు జరగనుండగా.. ఆసియా ఎలెవన్ టీమ్‌ కోసం భారత్ నుంచి నలుగురు క్రికెటర్లని పంపుతున్నట్లు బీసీసీఐ అధ్యక్షుడు సౌరవ్ గంగూలీ తాజాగా బంగ్లాదేశ్ క్రికెట్ బోర్డుకి లేఖ రాశాడు.

బంగ్లాదేశ్ జాతిపిత షేక్ మజీబుర్ రహ్మన్ వందో జయంతి వేడుకల సందర్భంగా ఈ టీ20 సిరీస్‌ని నిర్వహించబోతున్నట్లు గత ఏడాది బంగ్లాదేశ్ ప్రకటించింది. దీంతో.. ఐసీసీ కూడా స్పందిస్తూ అధికారికంగా టీ20 హోదాని ఇచ్చింది. పాకిస్థాన్ మినహా ఆసియా దేశాల నుంచి క్రికెటర్లు ఆసియా ఎలెవన్‌ టీమ్‌లో ఆడే అవకాశం ఉంది. ఇక వరల్డ్‌ ఎలెవన్ టీమ్‌లో మిగతా క్రికెట్ దేశాల నుంచి ఆటగాళ్లు ప్రాతినిథ్యం వహించనున్నారు. పాక్ క్రికెటర్లని ఆసియా టీమ్‌లో ఆడించమని హామి వచ్చిన తర్వాతే భారత క్రికెటర్లని పంపేందుకు బీసీసీఐ గ్రీన్‌ సిగ్నల్ ఇచ్చింది.

బంగ్లాదేశ్ క్రికెట్ బోర్డుకి తాజాగా సౌరవ్ గంగూలీ పంపిన లేఖలో భారత కెప్టెన్ విరాట్ కోహ్లీ, ఓపెనర్ శిఖర్ ధావన్, ఫాస్ట్ బౌలర్ మహ్మద్ షమీ, మణికట్టు స్పిన్నర్ కుల్దీప్ యాదవ్ పేర్లు ఉన్నట్లు వార్తలు వస్తున్నాయి. భారత్, దక్షిణాఫ్రికా మధ్య మార్చి 12 నుంచి 18 వరకూ మూడు వన్డే సిరీస్‌ జరగనుండగా.. ఈ నలుగురు క్రికెటర్ల షెడ్యూల్‌ని పరిశీలించిన తర్వాతే గంగూలీ వారు పేర్లని పంపినట్లు తెలుస్తోంది. దీంతో.. సఫారీలతో చివరి వన్డేలో ఈ నలుగురు క్రికెటర్లు దూరమవుతారా..? లేదా బంగ్లాదేశ్ క్రికెట్ బోర్డు మ్యాచ్‌ల షెడ్యూల్‌ని ఏమైనా మారుస్తుందేమో..? చూడాలి.