ఆల్‌రౌండర్ హార్దిక్ పాండ్యా ఆదాయం రూ. 25 కోట్లు

Share Icons:
టీమిండియా స్టార్ ఆల్‌రౌండర్‌ హార్దిక్ పాండ్యా ఆదాయం ఏటా క్రమంగా పెరుగుతోంది. ఒకప్పుడు మ్యాచ్‌ల సమయంలో భోజనం లేక బ్రెడ్‌ తిని కడుపు నింపుకున్న హార్దిక్ పాండ్యా.. ఇప్పుడు అత్యధిక ఆదాయం ఆర్జిస్తున్న భారత క్రికెటర్లలో ఒకడిగా ఉన్నాడు. ఎంతలా అంటే..? గత ఏడాది అక్టోబరు నుంచి ఈ ఏడాది మార్చి వరకూ వెన్ను గాయం కారణంగా క్రికెట్‌కి ఈ ఆల్‌రౌండర్ దూరంగా ఉన్నా.. 2019లో అతని ఆదాయం రూ. 25 కోట్ల పైమాటేనని తెలుస్తోంది.

భారత క్రికెట్ నియంత్రణ మండలి (బీసీసీఐ) ఏటా ప్రకటించే సెంట్రల్ కాంట్రాక్ట్‌లో బి గ్రేడ్‌లో ఉన్న హార్దిక్ పాండ్యాకి గత ఏడాది రూ. 3 కోట్లు అందగా.. 2019 ఐపీఎల్‌ సీజన్‌లో ఆడినందుకు ముంబయి ఇండియన్స్ ఫ్రాంఛైజీ అతనికి రూ. 11 కోట్లు ఇచ్చింది. ఇక స్టార్ట్ స్పోర్ట్స్, ఒప్పో, గల్ఫ్ ఆయిల్, హలాప్లే తదితర కంపెనీలకి ప్రచారకర్తగా ఉన్న హార్దిక్ పాండ్యా‌కి గత ఏడాది యాడ్స్ రూపంలో రూ. 11 కోట్లు అందినట్లు తెలుస్తోంది.

వెన్ను గాయం నుంచి కోలుకుని ఈ ఏడాది మార్చిలో భారత్ జట్టులోకి హార్దిక్ పాండ్యా రీఎంట్రీ ఇవ్వగా.. దక్షిణాఫ్రికాతో జరగాల్సిన వన్డే సిరీస్ కరోనా వైరస్ కారణంగా రద్దయింది. ఇక మార్చి 29 నుంచి ప్రారంభంకావాల్సిన ఐపీఎల్ 2020 సీజన్‌‌ని కూడా కరోనా వైరస్ కారణంగా బీసీసీఐ నిరవధికంగా వాయిదా వేసేసింది. ఒకవేళ ఈ ఏడాది ఐపీఎల్ రద్దయితే బీసీసీఐకి సుమారు రూ. 4000 కోట్లు నష్టరానుంది. అదే జరిగితే.. టీమిండియా క్రికెటర్ల జీతాల్లోనూ కోత పడే సూచనలు కనిపిస్తున్నాయి.