ఆకాశ్ చోప్రా ‘హెలికాప్టర్’ షాట్.. ఉతికారేస్తున్న ధోనీ ఫ్యాన్స్

Share Icons:
భారత మాజీ క్రికెటర్ మరోసారి మహేంద్రసింగ్ ధోనీ అభిమానుల ఆగ్రహానికి గురయ్యాడు. ఇటీవల టీ20 వరల్డ్‌కప్ కోసం భారత్ జట్టుని అంచనా వేసిన ఆకాశ్ చోప్రా అందులో ధోనీకి ఛాన్స్ ఇవ్వకపోవడంతో అతని అభిమానులు పెద్ద ఎత్తున విమర్శలు గుప్పించారు. ఎంతలా అంటే..? ధోనీ ఫ్యాన్స్ దెబ్బకి అతను సోషల్ మీడియాకి రెండు రోజులు దూరంగా ఉండిపోయాడు. ఆ తర్వాత ధోనీ ఎంపికని విస్మరించినందుకు క్షమాపణలు చెప్పిన ఆకాశ్ చోప్రా.. తాజాగా మరోసారి ధోనీ అభిమానుల్ని రెచ్చగొట్టే ప్రయత్నం చేశాడు.

ధోనీ అనగానే వెంటనే గుర్తొచ్చే హెలికాప్టర్‌ షాట్‌ని తాజాగా ఒంటిచేత్తో ఆడిన ఆకాశ్ చోప్రా.. ఆ వీడియోని సోషల్ మీడియాలో షేర్ చేశాడు. దాంతో అభిమానులు అతనిపై సెటైర్ల వర్షం కురిపిస్తున్నారు. నువ్వు ఆడిన షాట్‌ని అంతర్జాతీయ క్రికెట్‌లో ఆడితే 30 యార్డ్ సర్కిల్‌లోనే క్యాచ్‌గా దొరుకుతుందని ఒకరు కామెంట్ చేయగా.. ఆ బంతి హైట్ వెళ్లింది తప్ప ప్రయోజనం లేదని మరొకరు ఎద్దేవా చేశారు.

వాస్తవానికి ఆకాశ్ చోప్రా అంతర్జాతీయ క్రికెట్ కెరీర్‌లో చెప్పుకోదగ్గ ప్రదర్శన ఒక్కటీ కనబర్చలేదు. కేవలం ఏడాది మాత్రమే ఇంటర్నేషనల్ క్రికెట్‌ ఆడిన చోప్రా.. 10 టెస్టులాడి 23 సగటుతో 437 పరుగులు చేశాడు. ఇందులో రెండు హాఫ్ సెంచరీలు మాత్రమే ఉన్నాయి. ఇక 2004లో కెరీర్‌ని ముగించిన చోప్రా.. కనీసం ఒక్క వన్డే, టీ20 కూడా ఆడలేదు. అయితే.. మ్యాచ్ కామెంటేటర్‌గా మాత్రం సుదీర్ఘకాలంగా అతను విజయవంతంగా కొనసాగుతున్నాడు.