అంబటి రాయుడి వేటుపై మళ్లీ చర్చ.. గంభీర్ ఘాటు వ్యాఖ్యలు

Share Icons:
భారత వెటరన్ క్రికెటర్ అంబటి రాయుడిపై వేటు గురించి మళ్లీ చర్చ తెరపైకి వచ్చింది. 2019 వన్డే ప్రపంచకప్‌‌లో అంబటి రాయుడ్ని పక్కన పెట్టిన అప్పటి భారత సెలక్టర్లు.. అతని స్థానంలో విజయ్ శంకర్‌కి అవకాశమిచ్చారు. ఆ ఎంపికని సమర్థించుకున్న అప్పటి చీఫ్ సెలెక్టర్ ఎమ్మెస్కే ప్రసాద్.. శంకర్ బౌలింగ్, బ్యాటింగ్, ఫీల్డింగ్ ఇలా మూడు కోణాల్లో (3 Dimensional) జట్టుకి ఉపయోగపడతాడని చెప్పుకొచ్చాడు. దాంతో.. వరల్డ్‌కప్‌ ఆరంభానికి ముందే తాను 3D కళ్లద్దాలకి ఆర్డర్‌ ఇచ్చినట్లు సెటైర్ పేల్చగా.. అతనిపై వేటు సమంజసం కాదని చాలా మంది మాజీ క్రికెటర్లు అభిప్రాయపడ్డారు.

భారత మాజీ క్రికెటర్లు గౌతమ్ గంభీర్, కె. శ్రీకాంత్, మాజీ చీఫ్ సెలక్టర్ ఎమ్మెస్కే ప్రసాద్ తాజాగా ఓ చర్చా వేదికలో పాల్గొనగా.. అందులో అంబటి రాయుడిపై వేటు గురించి చర్చ వచ్చింది. దాంతో గౌతమ్ గంభీర్ వరుస ప్రశ్నలు గుప్పించాడు. అయితే.. ఎమ్మెస్కే ప్రసాద్ కూడా తన ఎంపికని సమర్థించుకున్నాడు. కె. శ్రీకాంత్ మాత్రం బ్యాలెన్స్‌గా మాట్లాడి తప్పించుకున్నాడు.

‘‘భారత సెలక్టర్లు నెం.4లో సమర్థంగా ఆడే ఆటగాడ్ని వరల్డ్‌కప్‌ వరకూ వెతికి పట్టుకోలేకపోయారు. టీమ్‌లో ఆ స్థానం మాత్రమే ఖాళీగా ఉండగా.. దాన్ని భర్తీ చేయలేకపోయారు. దాంతో ఏం జరిగింది..? అంబటి రాయుడ్ని ఆ స్థానంలో దాదాపు రెండేళ్లు ఆడించారు. కానీ.. వరల్డ్‌కప్‌ టైమ్‌లో మాత్రం 3D ఆటగాడు కావాల్సి వచ్చాడా..?’’ అని గౌతమ్ గంభీర్ ప్రశ్నించాడు.

గౌతమ్ గంభీర్ వాదనని మాజీ చీఫ్ సెలక్టర్ ఎమ్మెస్కే ప్రసాద్ తిరస్కరించాడు. ‘‘టీమిండియా టాప్ ఆర్డర్‌లో ఉన్న శిఖర్ ధావన్, రోహిత్ శర్మ, విరాట్ కోహ్లీలో ఎవరూ బౌలింగ్ చేయలేరు. కాబట్టి.. విజయ్ శంకర్ లాంటి ఆటగాడు టాప్ ఆర్డర్‌లో ఉంటే బ్యాటింగ్‌తో పాటు ఇంగ్లాండ్‌ పిచ్‌లపై బౌలింగ్‌తో టీమ్‌కి సాయపడతాడని ఆశించాం’’ అని వివరణ ఇచ్చాడు.